San Fernando City, La Union (6 October) — Inyanunsiyo iti Department of Health nga iparuar da manen iti mabiit dagiti dadduma pay a listaan iti gatas ken produkto a naaramid ken nalaukan iti gatas nga aggap-gapu idiay Tsina nga na-testing para iti kontaminasyon ti melamine.
Idi napan a lawas, kinuna ni Health Secretary Francisco Duque III nga apan pay sumsumbrek ti overtime ti weekend dagiti empleyados ti Bureau of Food and Drugs (BFAD) tapnu laeng mapapartak ti pannakapalpas ti testing dagiti nasurok a 200 a gatas ken prod-produkto nga aggapu ti gatas para iti possible a presensiya ti melamine kadagitoy.
“Itatta ta adda kadatayon dagiti reference standards, naparpartak ken nasay-sayaaten ti pannaka-testing dagitoy a produkto”, kuna ni Duque.
Addan dagiti immun-una a listaan dagiti sumagannad nga imparuaren ti DOH ken BFAD nga naka-anunsiyoan ti sapasap a panangiparit iti dua a produkto ti gatas ket dagitoy iti – Greenfood Yili Fresh Milk ken Mengniu Drink – nga napaneknekanen a kontaminado iti melamine.
Ti dua a produkto ket limmabas iti “high-pressure liquid chromatography” nga isu’t nakaduktalanda a kontaminado daytoy iti melamine nga addaan nasur-surok a 1.0 a parte ti kada milyon wenno “more than 1.0 parts per million (ppm).
Naigiddan iti daytoy a listaan ti agarup 28 nga items nga inikkat metten dagiti awtoridad manipud iti pannakai-ban wenno pannakaikkat ti pammalubos a mailako nga produkto ti Tsina kalpasan a maduktalan nga dagitoy ket nasalun-at wenno mabalin nga usaren ken kanen dagiti tattao.
Kinuna pay ni Duque nga posible a daytoy dua a produkto a nasao ket inlibas da laeng nga inyuneg (smuggled) ditoy pagilian. Binagaan na met iti Bureau of Customs (BOC) nga patibkeren da pay iti panag-guardia da kontra kadagiti kontrabando a produkto.
Inyunay-unay pay ti hepe ti DOH nga irekomendar na idiay Department of Trade and Industry (DTI), BOC, ken opisyal ti Chinese Embassy nga paayan da wenno mangi-file da ti rumbeng a kaso dagiti tattao nga adda biang na wenno nagbasulan na iti pannaka-iwaras dagitoy a kontrabando a gatgatas ken produkto manipud iti gatas.
Kinuna pay ni Duque nga dagiti matiliwan nga agiwar-waras ken agilak-lako kadagiti nasao a maiparit nga gatas ken parodukto manipud ti gatas ket maiyulian ti kaso nga kriminal ken administratibo para ti bayolasyon iti Article 18 Seksyon b iti Consumer Act. (PIA La Union)
