BAGUIO CITY – Dumanon itan iti 23 nga indibidual dagiti naka-confine ita iti Benguet General Hospital gapu iti diarrhea outbreak a napasamak sadiay barangay Bineng, iti ili ti La Trinidad.
Sigun iti Provincial Health Office (PHO), dumanon iti pakabuklan a 62 nga indibidual dagiti natamaan iti diarrhea iti nasao a lugar ngem dagiti laeng 23 ti nabati iti ospital.
Iti imbestigasyon dagiti Health officials, dadduma kadagiti biktima ket dimmar-ay iti maysa a pamunpon sadiay Barangay Bineng idi July 27.
Maibagbaga a pito a sitio iti nasao a lugar ti apektado iti diarrhea.
Mapapati a gapu daytoy iti kontaminado a suplay ti danum nga agtattaud manipud iti Alumit creek.
Mabasar iti naitparungpal a bacteriological analysis, positibo iti E. coli ti suplay ti danum nga agtattaud iti nasao a creek.
Naammuan a ti nasao a suplay ti danum ket napalawlawan iti kampo dagiti laborers nga awanan iti nasayaat a kasilyas, ken plantasyon ti sayote a maap-aplikaran iti organic ken inorganic fertilizers.
Gapu iti daytoy, maur-urnos itan ti suplay ti danum iti nasao a lugar.
